الشـوق مـالـه عـمـر , يفـنـى وينـعـاد

                    له في الضلوع أن عاد وأن غاب رجفه

مع كـل فرقـا , لـه ورى الجفـن ميـلاد

                    وأن ماتـت الفرقـا لقـى الشـوق حتفـه

جيـت أقتـل الفرقـا مــن بــلاد لـبــلاد

                    مــلّ الطـريـق يشيلـنـي فــوق كـتـفـه

وأنـا بعـد مليـت مـن كثـر مــا أرتــاد

                    هالشـارع اللـي كـان لـك فيـه شـرفـه

تظمـأ عيونـي شوفـك , وتشبـع سـهـاد

                    عيّـا الزمـن يقـطـع ظمـاهـا بـرشـفـه

لاوجهـك أسقـاهـا , ولا ذاقــت رقــاد

                    ماغيـر طيفـك , طيفـك الـلـي أعـرفـه

كنّـه ظبـي , وعيـونـي ظــلال صـيـاد

                    يجـفـل قـبـل يـرتــد للـجـفـن طـرفــه

مشكلتـه أنـه كـل مـا أشتـقـت يــزداد

                    حـتـى مــلا جــدران وقـتـي وسـقـفـه

وأصبحـت أشوفـه فـأول الغيـم لاجـاد

                    وفـأقصى الشفق لاطاحت الشمس خلفه

وفي الأرض لانامت عقب صوت رعاد

                    وفـي كـل شبـاك ٍ صحـت منـه درفــه

أتعبـت طيـفـك لــوم , والـلـوم مـافـاد

                    ويوم الأمـل فـي شوفتـك مـات نصفـه

نويـت أسافـر عـنـك بـجـروح ٍ جــداد

                    وعمر ٍ مـن أوراق الزمـن حـان قطفـه

نويـت , لكـن جابـنـي الـشـوق منـقـاد

                    وجابك حنينـك , والزمـن سـال عطفـه

شفتـك تبسّـم لـي خجـل مــدري عـنـاد

                    وفي نظرتك شـوق ٍ مـن الظلـم وصفـه

حسيـت كنـي طفـل , وعيونـك أعـيـاد

                    ياعيدي اللـي لـه ورى الصـدر رجفـه

سـمّ اللـقـا صـدفـة , وأسمّـيـه ميـعـاد

                    أنـا أنتظرتـك , وأنـت مريـت صـدفـه