الغربة ..

هُم غربوني والزمن دوم دوّار

مصدقين إن الوضع جايز(ن) لي

يالعنبوهم زوّدو بي الاكدار

لعنة يهودي كافر(ن) مايصلي

حسبي عليهم جلعهم صالي النار

ليه ابعدوني عن هلي ودار خلي؟

فقدت أنا ربع(ن) عزيزين(ن) كثار

ناس(ن) ترحب بي وناس(ن) تهلي

كثّرَت هواجيسي وراحت بي الافكار

يم الحبيب .. اللي علومه .. تسلي

وش هي علومه ياهلي وش هي الاخبار؟

سمعي ترى لأخبارهم ... ما يملي

ودي امر ديارهم مير مشوار

تربطني ظروف العمل في محلي

ياكيف بصبر ومابقى عندي اصرار

وش لي في ديره ماعرفها وملّي ؟

اسهرواهوجس دايم(ن) واكتب اشعار

لعلي ... انسى هموم قلبي ... لعلي

مليتنا دنياي .. يوم الزمن دار

ماعاد به شي(ن) غدا صافي(ن) لي

اربع جهاتي كلها جدار بجدار

والجو كتمه .. ما يداوي .. يعلي

الدمع من عيني على خدي مدرار

مقدر ارد دموعها .. لا تهلي

وش حيلة اللي عايش(ن) مثلي محتار

مقهور .. من دني(ن) دنيه تذلي

وش ارتجي من دنية(ن) طعمها مرار

وحظي الردي يمشي معي مثل ظلي

ياربي وش ذا الحال ياربي وش صار

ماني بمستوعب (ن) ذاللي حصل لي

مافي يدينا .. إلا نرضى بالأقدار

يحصل لنا المكتوب .. مهما نولي