تهون لعيونك حياتي ..

ياحياة الشقاوي ارحمي حال مسكين
عانق جروح المحبه من ليال(ن) طويله

وياعيون(ن) هويتي بين حين(ن) وحين
أذرفي دمعك ترى مافي يد المسكين حيله

وياقليبي تصبّر وخل عنك الونين
مهما ونيت وليفك ماتلاقي مثيله

سلمت لك قلبي وعيوني سوي فيها ماتبين
صارحيها واقنعيها مافي هالدنيا بديله

محتاج اضمك لصدري واحضنك وتدمعين
وامسح دموعك بكفّي وامحي كل هم(ن) وازيله

بادلي قلبي المحبه بادليه شوق وحنين
اكرمي قلبي بحبك ولاتكوني بخيله

اطلبي المستحيل واطلبي ماتشتهين
تهون لعيونك حياتي كل صعبه ومستحيله

انطقيها لا بغيتي انطقي ولاتستحين
قولي احبك ياحياتي وريّحي روحٍ(ن) عليله

حبك بقلبي تنمّى وزاد مع طول السنين
المحبة ياجماعه ماهي بيوم(ن) وليله

كل يوم وكل ليله ياعرب حالي تشين
من تعلى في سما وجو المحبه يويله