مها ( مهاوي )

لبيه .. ياعمري .. وياحلو لبيه

من ثغرك المعسول دافي الحكاوي

آمر .. تدلل .. ياحياتي و ألبيه

نبرات صوتك تعزف احلى الغناوي

واسلوبك الجذاب خلاني اتيه

ونظرة عيونك تجرح وماتداوي

ياللي معذب خافقي لاتشقيه

تكفى طلبتك لاتهده شقاوي

ارفق عليه وحاول انك تداريه

مهما شكينا من يحل الشكاوي

بشكي لربي من زمان(ن) اقاسيه

من يرجي الله ماتخيب الرجاوي

من واحد(ن) سبحان منهو مسويه

لا هوب لايرحم ولاهوب ياوي

اصبح خفوقي لعبة(ن) بين يديه

طحت بمتاهات العنا والمهاوي

المعذره ياقلبي هذا اللي تبغيه

متعلق(ن) في الزين ولا انت قاوي

جنني المزيون وش حيلتي فيه

ياناس عقبه داهمتني البلاوي

بعمري وروحي وكل مافيني افديه

كلي انا لعيون خلي فداوي

الله يخلي خلي لعين ترجيه

ياجعل قلبي ماهو منه خلاوي

مهما مدحنا فيه ماظن نوفيه

انسان مامثله له القلب هاوي

ماشفت انا بين البشر من يساويه

غصب(ن)عشقته وانا ماكنت ناوي

سكنته بقلبي وزود بلاويه

العشق بلوى يحيّرك بالهقاوي

الخافي اللي داخلي اجبرني احكيه

محبوب عاش بدنيتي بدر ضاوي

ونور حياتي وبيّن اللي مخفيه

دنياي دونه ظلمة(ن) ماتساوي

إن كان هو جالي ف الله يحييه

استقبله بالطيب وزين الحفاوي

وان راح ربي يحفظه لي ويخليه

الله يسهل له جميع الخطاوي

هذا حبيب القلب حيرتكم فيه؟

خلاص بكشف عن حقيقة خفاوي

تدرون منهو اللي انا احب واغليه؟

من غيرها ياناس هذي ( مهاوي )