وش في الحبيب ؟

وش في الحبيب اليوم ضايق وزعلان؟

وش في دموعه فوق خده سكايب ؟

تكفون قولو لي ترى خاطري شان

خلوه يضحك وحملوني المصايب

بشيل همه والمشاكل والأحزان

اللي تجدد به جروح(ن)عطايب

خلاص ياخلي كفى ذرف الاعيان

حزنك يزوّد في خفوقي لهايب

اضحك  .. تبسم .. ياحبيبي علشان

نعيش لحظات الفرح في العصايب

ونقهر زمان(ن) مر من بين الازمان

شفنا العجايب فيه .. وشفنا الغرايب

لحظات مستانس .. وأيام طفشان

وياشين لحظات الطفش والصعايب

تذرف دموعك لين احرقت الاوجان

وتبكي كذا. من دون أيّة سبايب

متكدّر وشايل همومك بالأطنان

وسنك صغير ولكن الراس شايب

بتواجه من الهم اشكال وألوان

واصعبها فرقا الطيبين الحبايب

بالله قلي كيف بتعيش ؟إذا كان

قلبك رهيف وطايع(ن) للهبايب

مجبور تقسى اذا ان كانك انسان

يبغى حياته جوها دوم .. طايب

إصّبر ويفرجها الولي عالي الشان

الصبر مفتاح الفرج في النشايب