رحت ادور عن عشيقه

راكب(ن) درب المحبة رحت ادوّر عن عشيقه
مستعين بربنا اللي .. عالم(ن) كل مايغيب

كل شخص بهالزمان لازم يحدد رفيقه
وانا اخترت الحبيب .. واتمنى لي يجيب

غرو(ن) معذب خفوقي بعذاب(ن) ما اطيقه
مبتليني في حياتي تارك(ن) قلبي صويب

بنار حبه شب فيني وشب في صدري حريقه
رحت انا ابحث عن طبيب ومعتقد غيره طبيب

ما يلام قليب عاشق لا غدا بخاطرّه ضيقه
ولاتلوم احوال حاله لا غدا وجهه شحيب

ليتك تذوقي اللي ذقته من حياتك لو دقيقه
انتي منتي انسان عادي انتي لك طَبّعِ(ن)غريب

اعرفي حبك بقلبي وروحي بروحك غريقه
لكن وش هي الطريقه لين تبقين الحبيب؟

علّميني وفهّميني وش هي لك افضل طريقه؟
وسلّكيني درب صايب مابي دروب تخيب

قلبي محبوس بحياتك وتقهره روح(ن) طليقه
انا باخذ حقي منّك بالغصب ماهو بطيب

وراح اظل اتبع سرابك لين توضح لي الحقيقه
أما افقد للأمل .. وإلا يكتب لي نصيب